Сёлета Барысаўшчына дасягнула значных поспехаў у жывёлагадоўлі. Рэгіён па надоях малака займае сёмае месца ў вобласці. Свой уклад у такі вынік унеслі і спецыялісты па аднаўленню статкаў. 7 жніўня сярод іх райплемстанцыяй праведзен конкурс-атэстацыя. Даведаліся, хто стаў лепшым.

У конкурсе ўдзельнічаў дваццаць адзін аператар па штучнаму асемяненню з большасці сельгаспрадпрыемстваў раёна. Перад кампетэнтным журы яны адказвалі на тэарэтычныя пытанні, а таксама дэманстравалі свае ўменні і навыкі, выконваючы практычнае заданне.

— Такі конкурс праходзіць на Барысаўшчыне штогод, — патлумачыў дырэктар Барысаўскага філіяла РУСП «Мінскае племпрадпрыемства» Сяргей Ціцянок. — Акрамя своеасаблівага экзамену па тэорыі і практыцы, улічвалася, як тэхнікі-асемянатары спрацавалі за мінулы перыяд. Паказчык выхаду цялят на сто кароў у особных спецыялістаў дасягнуў 98. Гэта дастойны вынік. Наогул барысаўскія аператары па штучнаму асемяненню лепшыя ў вобласці. Таму з заданнямі яны справіліся на выдатна.

Але конкурс ёсць конкурс. Па суме набраных балаў журы вызначыла пераможцаў. Першае месца заняла прадстаўніца ААТ «Міраполле» Юлія Нікіфарава, другі вынік у аператара па штучнаму асемяненню гэтай жа гаспадаркі Таццяны Камароўскай. Бронзу конкурсу ўзяла спецыяліст прыватнай гаспадаркі «Азёры Агра» Таццяна Задруцкая. Ім уручаны дыпломы і каштоўныя падарункі ад райкама прафсаюза работнікаў АПК.

— Хачу павіншаваць пераможцаў з дастойнымі вынікамі, а Юліі Нікіфаравай пажадаць паспяхова прадставіць наш раён на абласным узроўні, — сказала пры ўзнагароджанні лепшых тэхнікаў-асемянатараў старшыня райкама прафсаюза работнікаў АПК Антаніна Котава. — Такія конкурсы-атэстацыі праводзяцца толькі сярод спецыялістаў па аднаўленню статкаў, што гаворыць аб важнасці вашай прафесіі. Упэўнена, што на будучы год вы прадэманструеце яшчэ лепшыя вынікі.

Пераможца конкурсу працуе ў акцыянерным таварыстве «Міраполле» з 2005 года, апошнія сем год — на МТФ «Падбярэззе». У яе адзін з самых высокіх у раёне паказчыкаў выхаду цялят на сто кароў.

— Такі вынік — гэта агульная заслуга калектыву нашай фермы. Без дапамогі тых, хто працуе са мной побач, яго б не было, — заўважыла Юлія Нікіфарава. — У конкурсе найбольш складанымі для мяне былі тэарэтычныя пытанні, у практычных жа заданнях цяжкасцей не ўзнікала, бо маю вялікі вопыт.

Наперадзе ў Юліі Уладзіславаўны абласны этап конкурсу. Спадзяёмся на яе паспяховае выступленне. Лепшага ж аператара па штучнаму асемяненню рэспублікі выберуць 16 верасня ў Магілёве.

Інга РАМАНОЎСКАЯ, фота аўтара і райплемстанцыі