Сёння на ўгоддзях ААТ "Птушкафабрыка Вяляцічы" адбылося традыцыйнае свята "Зажынкі". Прыгожае мерапрыемства праходзіла з удзелам старшыні Барысаўскага райвыканкама Мікалая Карповіча, яго намеснікаў, старшыні раённага Савета дэпутатаў Ліліі Чэча, парламентарыя Ліліі Ананіч, кіраўнікоў сельгаcпрадпрыемстваў раёна, старшыні райкама Беларускага прафсаюза работнікаў АПК Антаніны Котавай і іншых. Гасцямі свята сталі прадстаўнікі Петушынскага раёна Уладзімірскай вобласці Расійскай Федэрацыі.

- Добры дзень, паважаныя камбайнеры, аграномы, кіраўнікі, - звярнуўся да прысутных Мікалай Карповіч. - Увесь год вы ўзворвалі глебу, сеялі зерне, апрацоўвалі зямлю. І зараз трэба плённа і аператыўна працаваць, каб атрымаць максімальны ўраджай. Нам належыць убраць 23 300 га зерневых. У прыватнасці, тут расце пшаніца, якая мінімум 50 ц/га будзе. Гэта важкая ўраджайнасць. 71 камбайн, усе гатовыя да ўборачнай, 56 прэсаў, каб аператыўна ўбраць салому. І самае галоўнае - нашы камбайнеры.

Мікалай Мікалаевіч падкрэсліў, што марудзіць не прыходзіцца: трэба сабраць хлеб з палёў Барысаўшчыны літаральна за 20 дзён. І захаваць пры гэтым кожнае зернейка.

Сцяг жніва ўзняў лепшы камбайнер гаспадаркі Аляксандр Сманцар.

Са cвятам павіншаваў прысутных протаіерэй Аляксандр Пачэпка, настаяцель храма Свяціцеля Мікалая Цудатворца ў Вялікай Ухалодзе.

Ён прывёў і словы Спасіцеля пра тое, як людзі павінны клапаціцца пра жніво.

- Гасподзь гаворыць сваім вучням-апосталам так: "Жніва многа, а працаўнікоў мала. Дык прасіце гаспадара жніва, каб прыслаў працаўнікоў на гэта жніво". Спадзяемся, што з дапамогай Божыяй мы атрымаем добры набытак з ураджаю, - адзначыў протаіерей.

Затым святар правёў малебен і чын асвячэння зерня і тэхнікі.

Прыгожым і відовішчным стаў момант, калі жнейкі з песнямі накіраваліся жаць першы сноп. Невялікія снапочкі - сімвалы новага ўраджая атрымалі госці свята і галоўныя героі жніва - камбайнеры.

Суправаджалася свята выступленнем народнага ансамбля народнай песні "Спадчына".

- Таварышы камбайнеры, у імя Госпада, зямлі і ўраджая - па машынах! - звярнуўся да кіроўцаў стэпавых караблёў дырэктар ААТ "Птушкафабрыка Вяляцічы" Араш Ханарджу.

Жніво пачалося.

Таццяна САКОВІЧ, фота аўтара